TRABALLO DO DÍA: 23 de abril

Bo día!

Hoxe, como sabedes. é o día do libro. Por ese motivo, hoxe unicamente teremos unha actividade literaria.

Tras un sorteo realizado ante tres testigos (os meus tres gatos), asignei a cada un de vós un personaxe protagonista, un antagonista e un espazo tirados dos contos que fixestes estes últimos días, doutros contos coñecidos e de libros coñecidos. Podedes consultalos na seguinte lista (preme para vela). Ademais... Quen sería capaz de dicirme de que obras saquei os elementos? Escribídeo nos comentarios.

Con eses personaxes e espazo, deberedes crear unha historia que cumpra coas seguintes condicións:

1. Debe ser un texto narrativo completo (con presentación, nó e desenlace)

2. Debe incluír unha descrición detallada, cando menos, dunha persoa e dun lugar.

3. O protagonista e o antagonista deben atoparse, cando menos, dúas veces cun período de tempo entre medias.

4. O relato debe incluír algún elemento relacionado coa maxia.

5. Debe aparecer, cando menos, unha criatura mitolóxica.

6. Calquera detalle orixinal será benvido.

Lembrade que, sempre que escribimos, debemos usar o noso PODER.

Pensar
Organizar
Decidir
Escribir
Revisar

Así que alá imos! Deixade voar a vosa imaxinación.